الناطِر والناطور وفي الجمع نواطير أي حافظ الزرع والكُروم وفي اللهجة اللبنانية "أًنطر" بمعنى إنتظر، والنَّطْرة هي الحفظ بالعينين والناطور هو الحارس ، كما أن كلمة "نطرة" هي تعبير عن طول الانتظار وليس صحيحًا أن كلمة ناطور أتت من اللغة الانكليزية للحارس الليلي Night tour كما ذكر ، ويعتقد أن أصل الكلمة فارسية وتم تبديل الظاء ناظور بالطاء في العربية وصارت ناطور وتستخدم كلمة "نطر" بمعنى انطره أي أحفظه وراقبه.
وفي لبنان الكل ناطر فهناك من ينتظر المجيء الثاني ليسوع المسيح مخلص العالم وأنا منهم ، وهناك من ينتظر صاحب الزمان والمكان الامام المهدي عليه السلام وهناك من ينتظر مجيئ حاكم عادل يخلص شعب لبنان من جلاديه ، وبالعامية في اللي ناطر تجي الكهرباء والمي بالحنفية والمعاش الشهري الذي صار بلا قيمة مع انهيار الليرة اللبنانية امام الدولار ، واللي ناطر فيزا للهجرة على كندا واللي ناطر تخلص الكورونا والمتحورات واللي ناطر يسترد امواله من حرامية المصارف واللي ناطر يخلص العهد القوي ، واللي من زمان بعدو ناطر على موقف دارينا مع فيروز وهيك رح يخلص العمر والكل ناطر ..
وكمان في اللي ناطر مع مروان خوري في أغنية ناطر بعتم الليل وناطر حبي ناطر عذابك ناطر نرحل سوى بها لليل نسافر عالغيم نسافر بالحلم نسافر..وفي أنا اللي قاعد ناطر ، وفي ياجوج ناطر مأجوج وفي اللي ناطر الانتخابات للتغيير .. وفي اللي ما بيعرف يجاوب لانه ناطر الجواب من مشغله واللي ناطر هواكم ناطر ، وفي اللي بيحن للغايب الحاضر وقلبه كله شوق والى متىٰ رح يضل ناطر وفي المواطن اللبناني اللي ناطر الفرج خليك ناطر وهي ناطرة كمان …
نقولا ابو فيصل ✍️