· 

رئيس قسم المجدل الكتائبي ايلي عساكر في عيد الام: منوعدكن نبني وطن على صورة ولادكن


في يوم عيد الأم كتب رئيس قسم المجدل الكتائبي ايلي عساكر على صفحته عبر الفايسبوك:


لأنو اليوم في إمّات الدمعة بعينن والحرقة بقلبن..

في إمات سلخولها ولادها عن قلبها وهيدي أول سنة بيمرق عيد الأم علين هيك..

في إمّات لابسة أسود راحت حطّت زهور ع بواب مسكّرة، نايمين ولادن وراها وهنّي اللي كانوا وبعدن بيضجّوا حياة..

في إمّات ناطرين ولادن يرجعوا من غربة انجبروا يتركوا وطنن ويكونوا فيها، غربة هنّي عارفين بينن وبين حالن إنو ما رح تخلص، وبينطروا كل يوم يلمسوا وج إبنن ويشمّوا ريحتو ويغمروه قبل ما يخلص هالعمر..

في إمّات عم بيناموا ولادن بلا عشا، بلا حليب، بلا شي..

عم بيناموا غرقانين بدموع وقهر لأنو مش قادرين يغيّروا هالواقع اللي انحطّوا فيه هنّي وعيلهن.. 

بعيد الأم السنة مش رح نعيّدكن، رح نوعدكن نكمّل نضال كرمال نحط حدّ لكل هالمعاناة ونقدر نبني وطن على صورة ولادكن اللي دفعوا دم ودموع وجوع وعذاب وقهر..

كرمال ما يكونوا كلّ هالتضحيات راحوا هدر، منوعدكن نكمّل..